I Anglikani čhib si ničekerdi an čhibengere grupe majbut vakerde sar „avutnipaskere čhiba,, adaleske so si majbut istemalkerdi an i sciencia, tehnika, kultúra, diplomatia thaj biznisi. Adaleske voj majbut sikljola pe, na salde an o regionia kolende lasa majbut kerela pe lafi, numa thaj an sakole civilizirime themate an i lumia. But baro kotor tari scientengiri thaj phirnutni literatúra, numa thaj taro lumiakoro liljaripe, ikalena pe ki akaja čhib.

          O llustririme lafzako - haj te sikljova anglikane thaj makedonikane - si kerdo te šaj te pherel jekh čučipe an amaro maškaripe thaj ple čororea, numa bare nišanea, lagengere fondea ko akala čhiba, te ovel pendžardo pobut populaciakere kategoriende. šurarkerindo taro adala an o anglosikljovibaskiri, fundavne školakiri, maškarune školakiri thaj uče školakiri edukacia, thaj sa dži o kategórie dizutne, bukjarne ja pale penzioneria, kolenge so ka pikarel pe barjakeren plo džanibe baš i lumia, prekal i sakodiveskiri komunikacia e neve bukjencaso amende avena prekal o elektrikane mediumia, taro but reonia ki amari planéta.

          An jekh asavki popularnikani verzia, lafzake isi le funkcia sar avgo kursi baš akala čhiba, adaleske so prekal lafengoro fondi, sa o manuša so interesirinena pe vov te arakhljovel lengere vastende, ka ulikerel len an anglosaksoniakoro kulturakoro barvalipe. Numa, thaj ka motivirinel len baš o lengoro horizontengoro buvljakeribe, džanibe thaj informacie baš o but čipote, situacie thaj bukja so ule, a kola so sako dive ovena an o dur thana ki Lumia. Haljovela pe, asavke ikalde bukja ka anen dži ko barjovibe thaj ki romani čhib thaj lakoro barvalipe dži digra savi so šaj kerela pošukar džanibe ko but bare bukja so kerena pe ko akala duj čhiba. I vizuelnikani komponenta ko Lafzako si majšukar čhani baš o avibe dži adaja resarin.

          Ko Lafzakoskoro agor si thanakerde thaj o lafia ki romani-anglikani-makedonikani, anglikani-romani-makedonikani thaj makedonikani-romani-anglikani čhib, save so si dende aso abecedakoro ničekeribe thaj pal o rigengoro gendo, thaj ola šaj lokho te arakhen pe. Adaleske, ka ovel baro hošibe te kerel pe buti e Lafzakosa, te arakhen pe neve dikhiba kola so amaro dživdipe ka keren šužo thaj bahtalo.